En Val Müstair fa Peider, 33, tut ses transports cun il cargovelo
Jau hai siemià ditg d'in cargovelo ed insacura hai jau pensà: va betg, na datti betg! Uschia hai jau simplamain empruvà ora quai ed i funcziuna propi: jau fatsch entant 80% da tut mes transports e mias acziuns cun mes cargovelo. Igl è cool d'esser in pionier en la val. Per che quai funcziunia dovr jau vias da velos ladas e passapes senza urs. Fitg engraziaivel sun jau per tut las staziuns da chargiar en l'entira val. Uschia na rest jau mai pendì amez ina taissa e poss chargiar mes cargovelo sche necessari.
Quai che Peider dovra
-
Staziuns da chargiar e da reparar velos porschan la pussaivladad da chargiar il velo electric, utensils da reparatura, pumpas e savens era tocs da reserva per far reparaturas pli pitschnas vi dals velos. Plinavant pon ins nizzegiar ellas sco post da consultaziun per infurmaziuns davart vias da velos, rutas u autras dumondas en connex cun velos.
-
Traversas senza nivels pussibiliteschan da traversar ina via u in binari senza stuair surmuntar ina differenza d'autezza u stgalims. Questas traversas èn construidas senza barrieras e porschan per exempel rampas u punts per pedun:as, ciclist:as u persunas cun ina mobilitad restrenschida. Ellas contribueschan ad in moviment fluid, a la segirezza ed a l'accessibladad en il traffic.
-
In cargovelo è in velo cun ina construcziun speziala che pussibilitescha da transportar rauba u passagiers. Tipicamain ha quel davant u davos la ciclista u il ciclist ina gronda surfatscha da chargiar per transportar rauba. Cargovelos èn favuraivels al clima e grazia a lur motors ferms pon ins entant duvrar els er en il Grischun quasi dapertut.