Tuts temas en in'egliada

La Regenza dal chantun Grischun ha percurschì il grond potenzial dal velo ed ha perquai instradà differentas mesiras. Ella ha approvà il 2019 il Plan secturial Velo e plinavant integrà in punct d'accent da svilup en il program da la Regenza 2021-2024. Quest punct sa numna «Il spustament dal traffic motorisà individual sin il traffic public ed il traffic plaun vegn promovì». Quest spustament po dentant mo gartegiar, sch'i stat a disposiziun in'infrastructura da velos nuninterrutta e segira.

Per ch'il velo daventia adattà sco med da transport equivalent en il mintgadi grischun, dovri dapli attenziun da las scolas, da las vischnancas e da las patrunas pli grondas e dals patruns pli gronds. Nus appellain a la populaziun, a planisad:ras, a partiziuns da resursas umanas, a persunas d'instrucziun ed a policist:as da traffic d'integrar il velo en lur program da promoziun, da tematisar regularmain il velo e d'ans contactar per support ed ideas.

Ina ruta da confort per velos è in tschancun u ina via ch'è vegnida planisada consequentamain per ciclist:as. Ella è concepida uschia ch'ins ha cundiziuns optimalas per ir cun velo. Quai cuntansch'ins cun vias da velos separadas, vials da velo sin via separads architectonicamain u zonas cun damain traffic. Rutas da confort per velos promovan cumprovadamain l'ir cun velo e contribueschan a la segirezza en il traffic ed a la reducziun dal traffic. Ellas èn ina part impurtanta d'ina infrastructura da traffic favuraivla al velo.

Bike to work è in'acziun svizra per promover la sanadad en interpresas. Mintg'onn sa participeschan passa 97'000 collavuraturas e collavuraturs durant il matg e zercladur a questa challenge e smatgan durant tants dis sco pussibel sin ils pedals e gudognan premis attractivs. Il 2023 èn 60 interpresas en il Grischun sa participadas a la challenge. Tut las participantas e tut ils participants ensemen han fatg betg main che 400'000 kilometers cun il velo! Il program promova la fitness ed il spiert da gruppa da las collavuraturas e dals collavuraturs ed ina mobilitad persistenta en Svizra.

Il mix da mobilitad actual en il chantun Grischun mussa ina bilantscha da clima fitg nauscha. In bun cumenzament per sbassar las emissiuns da CO2 e reducir ils custs ch'il traffic chaschuna en il chantun Grischun a l'economia publica è la midada a meds da transport effizients areguard l'energia che dovran pli pauc spazi. In potenzial spezialmain grond per dischlocar il traffic motorisà individual porscha il velo. En Svizra è mintga segund viadi cun l'auto pli curt che 5 kilometers ed uschia entaifer la distanza ch'ins po far bain cun il velo.

Ina buna signalisaziun da vias da velos duess esser clera, chapibla e bain visibla. Ella duess signalisar a moda clera e senza interrupziuns il decurs da la via da velos ed infurmaziuns impurtantas sco la distanza, las direcziuns e las reglas da traffic. Signalisaziuns en colur e simbols gidan ultra da quai a differenziar vias da velos dad autras vias da traffic e da sensibilisar automobilist:as per il fatg che la via è previsa era per aut:ras participant:as al traffic.

Il bikesharing è in sistem, en il qual ina cuminanza parta ils velos. Utilisad:ras pon emprestar velos per in curt temp ed ir per els e turnar els en differents lieus. Il meglier vi da questa soluziun è l'opziun da mobilitad cumadaivla, ecologica e bunmartgada che reducescha colonnas, schanegia l'ambient e promova la sanadad.

Vias da velos separadas èn statgadas fisicamain dal vial per vehichels a motor. Savens vegnan quellas vias separadas dal traffic d'autos cun saivs directivas u strivlas verdas u ch'ellas passan independentamain dal percurs da la via. Questa separaziun augmenta la segirezza per ciclist:as, perquai ch'els n'èn betg pli exponids a tantas situaziuns da traffic privlusas. Vias da velos separadas augmentan perquai la mobilitad dal velo e contribueschan considerablamain a la segirezza dal traffic.

Staziuns da chargiar e da reparar velos porschan la pussaivladad da chargiar il velo electric, utensils da reparatura, pumpas e savens era tocs da reserva per far reparaturas pli pitschnas vi dals velos. Plinavant pon ins nizzegiar ellas sco post da consultaziun per infurmaziuns davart vias da velos, rutas u autras dumondas en connex cun velos.

Traversas senza nivels pussibiliteschan da traversar ina via u in binari senza stuair surmuntar ina differenza d'autezza u stgalims. Questas traversas èn construidas senza barrieras e porschan per exempel rampas u punts per pedun:as, ciclist:as u persunas cun ina mobilitad restrenschida. Ellas contribueschan ad in moviment fluid, a la segirezza ed a l'accessibladad en il traffic.

In cargovelo è in velo cun ina construcziun speziala che pussibilitescha da transportar rauba u passagiers. Tipicamain ha quel davant u davos la ciclista u il ciclist ina gronda surfatscha da chargiar per transportar rauba. Cargovelos èn favuraivels al clima e grazia a lur motors ferms pon ins entant duvrar els er en il Grischun quasi dapertut.

La finamira principala da la reducziun dal traffic è d'augmentar la segirezza e da meglierar la qualitad da viver en regiuns urbanas e ruralas. Quai pon ins cuntanscher cun introducir limitas da tempo, extender inslas da traffic, augmentar las zonas da peduns e vias da velos sco era cun stgaffir zonas cun damain traffic.

In curs da velo augmenta la segirezza en il traffic e promova la sanadad e mobilitad per persunas da tut las vegliadetgnas. Curs da velo pussibiliteschan da survegnir e d'augmentar la segirezza, da reducir temas e da rinforzar la fidanza en il diever dal velo en il mintgadi. Contactai nus, sche Vus sco scola u vischnanca vulais porscher curs da velo.

Marcaziuns per terra èn per regla realisadas en furma da strivlas u cuvridas da colur e marcheschan a moda clera e visibla il decurs da la via da velos. Ellas gidan ciclist:as a s'orientar sin via ed augmentan considerablamain la segirezza cun separar il traffic da velos dals auters participants al traffic. Marcaziuns per terra èn ina pitga impurtanta d'ina infrastructura da velo signalisada bain e segira.

Per augmentar l'attractivitad dal velo en il mintgadi ed en il temp liber e plinavant promover ina mobilitad persistenta duain las vias principalas en il Grischun vegnir concepidas a moda pli adattada per velos. Actualmain datti bler memia paucas vias da velos segiras sin axas da traffic principalas. Quai n'è betg mo impurtant per il turissem, mabain era per il traffic da velos dal mintgadi, perquai che questas vias èn per regla las colliaziuns las pli sveltas.

Bike and rail cumbinescha l'ir cun velo ed il traffic public, betg mo per activitads turisticas, ma era per la via a la lavur u a scola. Il concept vegn sustegnì cun divers indrizs spezials a las staziuns, per exempel parcadis da velos u velos per emprestar per uschia facilitar la midada dal velo al traffic public.

Aspects impurtants per parcadis da velos èn la segirezza, l'accessibladad ed il confort. Els duessan esser protegids d'enguladitschs e da l'aura, esser bain accessibels ed illuminads bain. Plinavant duessan ils parcadis porscher avunda plazza ed in'infrastructura adattada per pudair deponer ils velos a moda segira. Plinavant èn decisivas l'integraziun en la circulaziun dal traffic e la distanza da la destinaziun.